Gənc Mühasiblər İctimai Birliyinin “Kiçik və Orta Sahibkarlıq mühasibləri üçün Peşəkar Mühasib Sertifikatı ilə bağlı maarifləndirici tədbirlərin təşkili” layihəsinin icrasına başlanılıb. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir.

2018-ci ildə "Mühasibat uçotu haqqında" Qanunda edilmiş dəyişikliklərlə dilimizə "peşəkar mühasib anlayışı" gətirildi: Peşəkar mühasib "Peşəkar mühasib" sertifikatına (PMS) və Peşəkar Mühasib Təşkilatına (PMT) üzv olan şəxsdir. Kiçik və orta sahibkarlıq subyektləri, büdcə təşkilatları, bir sıra ictimai əhəmiyyətli qurumlar və maliyyə hesabatlarını dərc edən publik hüquqi şəxslərin baş mühasiblərinin qarşısına 2021-ci il dekabrın 31-dən mərhələli şəkildə peşəkar mühasib olmaq şərti qoyulub. “Peşəkar mühasib sertifikatının verilməsi prosesinin təşkili, imtahanların keçirilməsi və peşəkar mühasib sertifikatı almış şəxslərin dövlət reyestrinin aparılması Qaydaları”nın təsdiq edilməsi haqqında Azərbaycan Respublikası Nazirlər Kabinetinin qərarının təsdiq olunmasına baxmayaraq, hələdə bu sahədə müəyyən problemlər mövcuddur. Dünya təcrübəsində olduğu kimi Azərbaycanda da dövlət və özəl sektorların peşəkar mühasiblərə ehtiyacı vardır. Azərbaycanda bir çox universitet bu ixtisası tədris edir, lakin təcrübə baxımından ixtisas üzrə lazımi bilik və bacarıqları təmin edə bilmirlər.  “Peşəkar mühasib sertifikatının verilməsi prosesinin təşkili, imtahanların keçirilməsi və peşəkar mühasib sertifikatı almış şəxslərin dövlət reyestrinin aparılması Qaydaları”nın təsdiq edilməsi haqqında Azərbaycan Respublikası Nazirlər Kabinetinin 2019-cu il 22 may tarixli 237 nömrəli Qərarına əsasən Peşəkar mühasib sertifikatının (PMS) verilməsi prosesinin təşkili və imtahanların keçirilməsi Azərbaycan Respublikasının Dövlət İmtahan Mərkəzi (DİM) tərəfindən həyata keçirilir. İB-in əsas məqsədi qanunun icrasının həyata keçirilməsinə töhvə verməkdir.

Belə ki, layihənin məqsədi ölkənin peşəkar kadr ehtiyatının gücləndirilməsi və imtahana hazırlıq səviyyəsininin artırılmasına dəstək olmaq məqsədilə bu sahədə fəaliyyət göstərən mühasiblərin bilik və bacarıqlarının inkişaf etdirilməsi ibarətdir. Layihə çərçivəsində Bakı və Gəncə şəhərlərində (özəl sektor nümayəndələri) mühasiblərinin və mütəxəssislərin iştirakı ilə peşəkar mühasib sertifikatının əldə edilməsi prosesinin təşkili, PMS-in əhəmiyyəti, PMS almağın üstünlükləri, imtahanların keçirilməsi və mövzu ilə bağlı iştirakçıları maraqlandıran digər məsələlərin müzakirə edilməsi məqsədilə hər bir şəhərdə 2 seminar və yekunda Bakı şəhərində dəyirmi masa keçiriləcək, PMS ilə bağlı maarifləndirici buklet hazırlanacaq və paylanılacaq.

Layihə çərçivəsində DİM - ilə əməkdaşlıq ediləcək. Əməkdaşlıq çərçivəsində DİM-lə memorandum imzalanması nəzərdə tutulur. Bu memoranduma əsasən keçirilən imtahan suallarına dair müəyyən təkliflər veriləcək. Layihə çərçivəsində həyata keçiriləcək dəyirmi masa və seminarlarda KOS mühasibləri və ekspertlər iştirak edəcək. Müzakirələr zamanı bu sahədə mövcud problemlərin aşkar edilərək əldə edilən təkliflər DİM-ə təqdim olunacaq. Bu da mühasiblər üçün PMS imtahanlarını daha aktual və əlçatan edəcək. 

Layihənin nəticəsi olaraq Layihə nəticəsində mühasiblər arasında rəqabət güclənəcəkdir. Bu da daha çox mühasibləri “peşəkar” statusu əldə etməyə sövq edəcəkdir. Bununla da müəssisələrin peşəkar mühasib axtarmaq problemləri azalacaq, əmək bazarında canlanmaya da müsbət təsir edəcəkdir. Mühasiblərin imtahana hazırlıq səviyyəsi artacaqdır.

Layihə 1 fevral 2022-ci il tarixindən 1 may 2022-ci il tarixinə qədər müddəti əhatə edir.